ភ្នំពេញ៖ ក្រុមព័ត៌មាន និងទំនាក់ទំនងសាធារណៈនៃក្រសួងយុត្តិធម៌បានបញ្ជាក់ថាករណីក្រុមហ៊ុន CIC នៅពេលនេះសមត្ថកិច្ចកំពុងតាមដានជាប់ និងធ្វើការជាជំហានៗដើម្បីឈានទៅរកដំណោះស្រាយការពារផលប្រយោជន៍របស់អ្នកវិនិយោគតាមច្បាប់ទាំងអស់។

ក្នុងបណ្ដាញទំនាក់ទំនងតេឡេក្រាមនៅថ្ងៃទី២៥ ខែមីនា ឆ្នាំ ២០២៤នេះ ក្រុមព័ត៌មាន និងទំនាក់ទំនងសាធារណៈនៃក្រសួងយុត្តិធម៌បានច្រានចោលការចោទប្រកាន់ថាអាជ្ញាធរមានសមត្ថកិច្ចមិនធ្វើការលើករណីក្រុមហ៊ុន CIC នេះ ដោយស្នើឱ្យរង់ចាំមើល «អ្វីដែលជាដំណោះស្រាយតាមផ្លូវច្បាប់ក្នុងរឿងនេះដោយអាជ្ញាធរជាមុនសិន»។

ក្រសួងយុត្តិធម៌បានបញ្ជាក់ផងដែរថា ករណីរឿងក្រុមហ៊ុន CIC ពុំមែនជាដូចជាករណីរឿង ឡេង ចាន់ណា ដែលជាករណីសំណុំរឿងបោកប្រាស់នោះទេ ពោលគឺក្រុមហ៊ុននេះមានការចុះបញ្ជីដើម្បីធ្វើការវិនិយោគច្បាស់លាស់។

ក្រសួងបានបញ្ជាក់ថា៖ «ករណីរឿងក្រុមហ៊ុន CIC គឺជាក្រុមហ៊ុនដែលមានការចុះបញ្ជីដើម្បីធ្វើការវិនិយោគ មានក្រុមប្រឹក្សាភិបាលគ្រប់គ្រងច្បាស់លាស់ និងមានស្ថាប័នសមត្ថកិច្ច ត្រួតពិនិត្យកិច្ចការនេះ»។

បើតាមក្រសួងយុត្តិធម៌ក្នុងពេលដែលក្រុមហ៊ុនជួបវិបត្តិ ពិសេស ត្រូវបានលើកទឹកចិត្តក្នុងការរកដំណោះស្រាយមួយដែលល្អបំផុត ដើម្បីធានាឱ្យបានជាអតិបរមានូវផលប្រយោជន៍របស់អ្នកវិនិយោគក្នុងគ្រាដែលក្រុមហ៊ុនកំពុងជួបការលំបាក៕